ຂໍນອບນ້ອມແດ່ພຣະຜູ້ມີພຣະພາຄອະຣະຫັນຕະສັມມາສັມພຸທທະເຈົ້າພຣະອົງຄ໌ນັ້ນ…

ຂໍນອບນ້ອມແດ່ພຣະຜູ້ມີພຣະພາຄອະຣະຫັນຕະສັມມາສັມພຸທທະເຈົ້າພຣະອົງຄ໌ນັ້ນ… ຂໍນອບນ້ອມແດ່ພຣະຜູ້ມີພຣະພາຄອະຣະຫັນຕະສັມມາສັມພຸທທະເຈົ້າພຣະອົງຄ໌ນັ້ນ…

 

ຫລັກຄວາມຈິງຂອງຊີວິຕທີ່ຕ້ອງເປັນໄປ ”ຕາມເຫຕຸ-ຕາມປັຈຈັຍ”

 

      ພຣະພຸທທະອົງຄ໌ໄດ້ທຣົງ (ອ່ານວ່າຊົງ) ສະແດງປະຕິຈຈະສມຸປະບາທອັນເປັນຫລັກຄວາມຈິງຂອງຊີວິຕມະນຸສຍ໌ (ອ່ານວ່າມະນຸດ) ທີ່ຕ້ອງເກີດຂື້ນຕາມເຫຕຸປັຈຈັຍ (ອ່ານວ່າປັດໃຈ) ເມື່ອມີເຫຕຸກໍຍ່ອມມີຜົລ ແລະຜົລຂອງເຫຕຸຢ່າງນຶ່ງ ກໍຈະກາຍເປັນເຫຕຸຂອງອີກຢ່າງນຶ່ງ ຕໍ່ເນື່ອງກັນໄປ ປະຕິຈຈະສມຸປະບາທຈຶ່ງເປັນກົດທັມຊາຕິ ( Law of Nature) ຫຼືເປັນກົດແຫ່ງຄວາມເປັນສາເຫຕຸ (Causation Law) ຂອງພຸທທະສາສນາທີ່ມີຢູ່ແລ້ວ ກ່ອນການອຸບັຕຂື້ນ ຂອງພຣະພຸທທະເຈົ້າທັ້ງຫລາຍ ເປັນກົດທີ່ຕາຍໂຕ (ທັມມະນິຍາມຕາ) ແລະເປັນກົດທີ່ມີຢູ່ຕັ້ງຢູ່ຕາມທັມມະດາ (ທັມຖິຕິ) ດັ່ງພຸທທະພົຈນ໌ທີ່ພຣະອາຈາຣຍ໌ຜູ້ມີຄວາມຮູ້ໄດ້ແປຄວາມຫມາຍໄວ້ດັ່ງນີ້ “ຕະຖາຄົຕທັ້ງຫລາຍຈະອຸບັຕຫຼືບໍ່ກໍຕາມ ທາຕຸນັ້ນຍັງຄົງມີຢູ່ເປັນທັມຖິຕິ ເປັນທັມນິຍາມ ຄື ຫລັກ ອິທັປປັຈຈະຢະຕາ” ຄວາມລຶກຊຶ້ງຂອງປະຕິຈຈະສມຸປະບາທນີ້ຍາກທີ່ບຸຄຄົລ (ອ່ານວ່າບຸກຄົນ) ທັ່ວ ໆ ໄປຈະເຂົ້າໃຈໄດ້ຢ່າງຊັດແຈ້ງ ພຣະອົງຄ໌ທຣົງ (ອ່ານວ່າຊົງ) ຄົ້ນພົບກົດນີ້ ແລະໄດ້ສັ່ງສອນໃຫ້ບຸຄຄົລ ໃຫ້ເຫັນແຈ້ງໃນທັມມ໌ນີ້ເພື່ອຈະໄດ້ຮູ້ເທົ່າທັນໂລກ ແລະຊີວິຕບໍ່ຕົກເປັນທາສຂອງກິເລສຕັນຫາ ຈິຕເປັນອິສະຣະຫລຸດພົ້ນຈາກຄວາມທຸກຂ໌ ຜູ້ທີ່ຈະເປັນພຣະພຸທທະເຈົ້າໄດ້ຈະຕ້ອງຕຣັສ"ມາຈາກຄຳວ່າ ດຳ-ຣັສ ພ້ຽນເປັນ ຕຣັສ"ຮູ້ໃນເຣື່ອງປະຕິຈຈະສມຸປະບາທ

      ດັ່ງພຸທທະພົຈນ໌ທີ່ພຣະອາຈາຣຍ໌ຜູ້ມີຄວາມຮູ້ໄດ້ແປຄວາມຫມາຍວ່າ “ຜູ້ໃດເຫັນປະຕິຈຈະສມຸປະບາທ ຜູ້ນັ້ນຍ່ອມເຫັນທັມມ໌ ຜູ້ໃດເຫັນທັມມ໌ ຜູ້ນັ້ນຍ່ອມເຫັນປະຕິຈຈະສມຸປະບາທ” ແລະ “...ປະຕິຈຈະສມຸປະບາທນີ້ເປັນທັມມ໌ລຶກຊຶ້ງ ເພາະບໍ່ຮູ້ບໍ່ເຂົ້າໃຈ ແທງຕະຫຼອດຫລັກທັມມ໌ຂໍ້ນີ້ແຫລະ ຫມູ່ສັຕວ໌ຈຶ່ງວຸ່ນວາຍເຫມືອນເສັ້ນດ້າຍທີ່ຂອດກັນຢຸ່ງ ຈຶ່ງຄືເສ້ນດ້າຍທີ່ເປັນປົມ ຈຶ່ງເປັນເຫມືອນຫຍ້າມຸງກະຕ່າຍ ແລະຫຍ້າປ້ອງ ຈຶ່ງຜ່ານອະບາຍ ທຸຄະຕິ ວິນິບາຕ ສັງສາຣະວັຕ ໄປບໍ່ໄດ້” ໃນການອະທິບາຍປະຕິຈຈະສມຸປະບາທອາຈເຮັດໄດ້ 2 ວິທີ ຄື:

1. ສະແດງເປັນກາງ ໆ ບໍ່ຣະບຸຫັວຂໍ້ປັຈຈັຍ(ອ່ານວ່າປັດໃຈ)

“ເມື່ອສິ່ງນີ້ມີ ສິ່ງນີ້ຈຶ່ງມີ ເພາະສິ່ງນີ້ເກີດຂື້ນ ສິ່ງນີ້ຈຶ່ງເກີດຂື້ນ” ຫຼື “ເມື່ອສິ່ງນີ້ບໍ່ມີ ສິ່ງນີ້ກໍບໍ່ມີ ເພາະສິ່ງນີ້ດັບໄປ ສິ່ງນີ້ກໍດັບ”

2. ສະແດງເຈາະຈົງຣະບຸຫັວຂໍ້ປັຈຈັຍ(ອ່ານວ່າປັດໃຈ)ຕ່າງ ໆ ຊຶ່ງເກີດຕິດຕໍ່ກັນເປັນສາຍໃນຮອບ ນຶ່ງມີ 12 ອາການ ດັ່ງນີ້ຄື:

      ອະວິຊຊາ (Ignorance) ຄື ຄວາມບໍ່ຮູ້ຕາມຄວາມເປັນຈິງ ອັນໄດ້ແກ່ ຄວາມເຂົ້າໃຈວ່າການເກີດ ໃນສວຣຣຄ໌(ອ່ານວ່າສະຫວັນ)ເປັນຍອດແຫ່ງຄວາມສຸຂ ຄວາມເຂົ້າໃຈວ່າໂຕຕົນນີ້ຈະໄດ້ໄປເກີດ ເປັນສິ່ງຕ່າງ ໆ ການເຂົ້າໃຈວ່າ ຕາຍແລ້ວສູນ ແລະຄວາມເຂົ້າໃຈວ່າຈະໄປນິພພານໄດ້ດ້ວຍການ ບຳເພັນຕະບະເປັນຕົ້ນ

      ສັງຂາຣ (Volitional activities) ຄື ການປຸງແຕ່ງໃຫ້ເກີດຫນ້າທີ່ທາງກາຍ ວາຈາ ແລະໃຈ ແລະການສະແດງອອກຊຶ່ງເຈຕະນາເປັນການເຮັດຕ່າງ ໆ ທັ້ງກຣຣມ(ອ່ານວ່າກັມ)ດີແນ່ ກຣຣມ ຊັ່ວແນ່ ຫຼືເປັນກາງ ໆ ທີ່ເອິ້ນວ່າ ອາເນນຊາແນ່

      ວິນຍານ (Consciousness) ຄື ການຮັບຮູ້ອາຣົມນ໌ຕ່າງ ໆ ໄດ້ແກ່ ການເຫັນ ການໄດ້ຍີນ ໄດ້ກລິ່ນ ຮູ້ຣົສ ຮູ້ສັມຜັສ ແລະຮູ້ອາຣົມນ໌ທີ່ມີໃນໃຈ

      ນາມຣູປ ( mind and matter ) ນາມໄດ້ແກ່ ເວທະນາ ສັນຍາ ເຈຕນາ ຜັສສະ ມະນະສິ ກາລ ຫຼືຕາມແບບອະພິທັມມ໌ ໄດ້ແກ່ ເວທະນາຂັນທ໌ ສັນຍາຂັນທ໌ ສັງຂາຣະຂັນທ໌ ສ່ວນຣູປ ໄດ້ແກ່ ມະຫາພູຕະຣູປ 4 (ທາຕຸດິນ ທາຕຸນ້ຳ ທາຕຸລົມ ທາຕຸໄຟ) ແລະອຸປາທາຢະຣູປ 4 (ຣູປອາສັຍຫຼືຣູປທີ່ສືບເນື່ອງມາຈາກມະຫາພູຕະຣູປ) ມີຕາ ຫູ ດັງ ລິ້ນ ກາຍ ຣູປ ສຽງ ກລິ່ນ ຣົສ (ໂຜຕຖັພພະ ບໍ່ນັບເພາະຕົງກັນກັບທາຕຸດິນ ທາຕຸໄຟ ແລະທາຕຸລົມ) ຄວາມເປັນຫຍິງ ຄວາມເປັນຊາຍທີ່ຕັ້ງຂອງຈິຕ (ຫະທັຢະວັຕຖຸ) ການສະແດງໃຫ້ຮູ້ຄວາມຫມາຍດ້ວຍກາຍ (ກາຍ ວິນຍັຕິ) ການສະແດງໃຫ້ຮູ້ຄວາມຫມາຍດ້ວຍວາຈາ (ວະຈີວິນຍັຕິ) ຊີວິຕິນທຣີຢ໌(ອ່ານວ່າຊີວິດຕິນ ຊີນ) ຊ່ອງວ່າງ ຄວາມເບົາຂອງຣູປ ຄວາມອ່ອນຫຢຸ່ນຂອງຣູປ ພາວະທີ່ຄວນແກ່ການງານຂອງ ຣູປ ຄວາມຈະເຣີນຫຼືຄວາມຂະຍາຍໂຕຂອງຣູປ ການສືບຕໍ່ຂອງຣູປ ຄວາມເສື່ອມໂຕ (ຊະຣາ) ຄວາມສະຫຼາຍໂຕ (ອະນິຈຈະຕາ) ແລະອາຫາຣ ຮ່ວມຄວາມແລ້ວ ນາມຣູປ ຄື ຄວາມມີຢູ່ຂອງ ຣູປທັມມ໌ແລະນາມທັມມ໌ໃນຄວາມຮັບຮູ້ຂອງບຸຄຄົລ(ອ່ານວ່າບຸກຄົນ) ເປັນພາວະຣ່າງກາຍ ແລະຈິຕ ໃຈທຸກສ່ວນຢູ່ໃນສະພາບສອດຄ້ອງແລະປະຕິບັຕຫນ້າທີ່ເພື່ອຕອບສະໜອງໃນແນວທາງຂອງວິນຍານທີ່ເກີດຂື້ນນັ້ນ

      ສະຫຼາຍະຕະນະ ( the six sense-bases ) ໄດ້ແກ່ ອາຍະຕະນະ 6 ມີ ຕາ ຫູ ດັງ ລິ້ນ ກາຍ ໃຈ

      ຜັສສະ ( contact ) ຄື ການເຊື່ອມຕໍ່ຄວາມຮູ້ກັບໂລກພາຍນອກ ເກີດຈາກອາຍະຕະນະພາຍໃນ ອາຍະຕະນະພາຍນອກແລະວິນຍານ ເຮັດງານຣ່ວມກັນ

      ເວທະນາ ( feeling ) ຄືຄວາມຮູ້ສຶກຫຼືການສະເວີຍອາຣົມນ໌ທີ່ຈະຕ້ອງເກີດຂື້ນໃນຣູປໃດຣູປນຶ່ງ ມີສຸຂເວທະນາ ທຸກຂະເວທະນາ ແລະອະທຸກຂະມະສຸຂເວທະນາ (ສື່ ໆ ບໍ່ສຸຂ ບໍ່ທຸກຂ໌)

      ຕັນຫາ ( craving ) ຄື ຄວາມຍາກມີ 6 ຄື ຣູປຕັນຫາ ສັທທະຕັນຫາ (ຕັນຫາໃນສຽງ) ຄັນທະຕັນຫາ (ໃນກລິ່ນ) ຣັສະຕັນຫາ (ໃນຣົສ) ໂຜດຖັພພະຕັນຫາ (ໃນສັມຜັສທາງກາຍ) ທັມມະຕັນຫາ (ໃນທັມມາຣົມນ໌) ແຕ່ຖ້າແບ່ງໂດຍອາການມີ 3 ຄື ກາມຕັນຫາ ພະວະຕັນຫາ ແລະວິພາວະຕັນຫາ

      ອຸປາທານ ( attachment ) ຄື ຄວາມຍຶດຕິດ ມີ 4 ຄື ກາມຸປາທານ ທິດຖຸປາທານ ສີສັພພຕຸປາທານ ແລະອັຕຕະວາທຸປາທານ

      ພົພ(ອ່ານວ່າພົບ) ( becoming ) ຄື ພາວະແຫ່ງຊີວິຕສຳຫຼັບໂຕຕົນຫຼືໂຕຕົນທີ່ຈະມີເປັນໃນຣູປ ໃດຣູປນຶ່ງ ໂດຍສອດຄ້ອງກັບອຸປາທານແລະພຶຕິກຣຣມ(ອ່ານວ່າພຶດ-ຕິ-ກັມ)ນັ້ນ ໆ ມີ 3 ຄື ກາມພົພ ຣູປພົພ ອະຣູປພົພ

      ຊາຕິ ( birth ) ຄື ການເກີດຕະຫນັກໃນໂຕຕົນ ຫຼືການປຣາກົຕແຫ່ງຂັນທ໌ທັ້ງຫລາຍ

      ຊະຣາ ມໍຣະນະ ( decay and death ) ໄດ້ແກ່ ຄວາມແກ່ແລະຄວາມຕາຍຫຼືຄວາມສຳນຶກໃນ ຄວາມຂາດຫຼືພາກແຫ່ງໂຕຕົນຈາກພາວະຊີວິຕນັ້ນ ຈຶ່ງເກີດ ໂສກະ ປະຣິເທວະ ທຸກຂ໌ ໂທມະນັສ ອຸປາຢາສະ ຕິດຕາມມາ  ນອກຈາກນີ້ໃນການອະທິບາຍປະຕິຈຈະສມຸປະບາທນັ້ນຍັງອະທິບາຍ ໄດ້ໂດຍແບ່ງອອກເປັນ 2 ກະບວນການ ຄື

      1. ປະຕິຈຈະສມຸປະບາທ ທີ່ສະແດງກະບວນການເກີດ ເອິ້ນວ່າ ສະມຸທັຍະວາຣະ

      2. ປະຕິຈຈະສມຸປະບາທ ທີ່ສະແດງກະບວນການດັບ ເອິ້ນວ່າ ນິໂຣທະວາຣະ

      ພຣະພຸທທະອົງຄ໌ທຣົງຕຣັສທັ້ງຄວາມເກີດແລະຄວາມດັບໄປພ້ອມກັນ ໂດຍເຣິ່ມຈາກ ອະວິຊຊາເຮັດໃຫ້ເກີດສັງຂາຣ ໄປຈົນວ່າເຖິ່ງເວທະນາເຮັດໃຫ້ເກີດຕັນຫາ ພໍເຖິ່ງຕັນຫາມີສະຕິເກີດຂື້ນບໍ່ປ່ອຍໄປຕາມກະແສຂອງປະຕິຈຈະສມຸປະບາທ ຈຶ່ງສາມາດດັບຕັນຫາໄດ້ ອຸປາທານກໍດັບ ພົພດັບ ຊາຕິດັບ ຊະຣາມໍຣະນະ ໂສກະ ປະຣິເທວະດັບກັນໄປຕະຫຼອດສາຍ

      ນອກຈາກ ຫລັກຄຳສອນໃນເຣື່ອງອະຣິຍະສັຈ 4 ແລະປະຕິຈຈະສມຸປະບາທແລ້ວຍັງມີຫລັກຄຳສອນອີກ ເຣື່ອງທີ່ສັມພັນທ໌ກັບປະຕິຈຈະສມຸປະບາທ ຄື ຫລັກກຣຣມ (ອ່ານວ່າກັມ) ອັນເປັນເຣື່ອງທີ່ມີຜູ້ກ່າວເຖິ່ງ ແລະຕີຄວາມກັນຫລາກຫລາຍອອກໄປ ແຕ່ທັ້ງຫມົດນີ້ກໍເພື່ອສະແດງໃຫ້ເຫັນເຖິ່ງຄວາມເປັນເຫຕຸຜົລຂອງກົດທັມມະຊາຕິ ທີ່ມີຢູ່ເຫນືອສັພຊີວິຕ

      ທ່ານອາຈາຣຍ໌ສະຖຽນ ໂພທິນັນທະ ເປັນບຸຄຄົລທີ່ຂ້າພະເຈົ້າໄດ້ຕິດຕາມກາຣສຶກສາແລະກາຣເຜີຍແພ່ທັມມະຂອງທ່ານ ເຫັນວ່າທ່ານສະແດງໄດ້ພິສະດາຣ ເໝາະສຳຫຼັບຄົນທີ່ຄວາມຮູ້ໃນທາງວິຊາກາຣ ຈຶ່ງໄດ້ນຳບົທຄວາມກາຣສະແດງທັມມ໌ ຂອງທ່ານມາໃຫ້ຟັງກັນ ຫວັງວ່າຄົງໃຫ້ປະໂຍຊນ໌ພໍສົມຄວຣ

1.      ປະຕິຈຈະສມຸປະບາທ

2.      ປະຕິຈຈະສມຸປະບາທ

3.      ປະຕິຈຈະສມຸປະບາທ

4.      ປະຕິຈຈະສມຸປະບາທ

     

ປະຕິຈຈະສະມຸປະບາທ ຕອນທີ່ນຶ່ງ
ໂດຍ: ອາຈາຣຍ໌ ສະຖຽນ ໂພທິນັນທະ



ປະຕິຈຈະສະມຸປະບາທ ຕອນທີ່ສອງ
ໂດຍ: ອາຈາຣຍ໌ ສະຖຽນ ໂພທິນັນທະ



ປະຕິຈຈະສະມຸປະບາທ ຕອນທີ່ສາມ
ໂດຍ: ອາຈາຣຍ໌ ສະຖຽນ ໂພທິນັນທະ



ປະຕິຈຈະສະມຸປະບາທ ຕອນທີ່ສີ່
ໂດຍ: ອາຈາຣຍ໌ ສະຖຽນ ໂພທິນັນທະ





………ດ້ວຍຄວາມປຣາຣະຖະນາດີ ຂໍໃຫ້ຈະເຣີນຍ໌ໃນທັມມ໌…ໄພທູຣຍ໌ ອິນທະວົງສ໌

ຂໍອະນຸໂມທະນາ